186               TESTAMENTS ENREGISTRÉS AU PARLEMENT DE PARIS            (426)
nostre sire et garde de la prevosté de Paris, salut. Savoir faisons que par devant Jehan Guerry et Jehan Piece, clers notaires jurez du roy nostre dit seigneur, de par lui establiz en son Chastellet de Paris, fu present honnorable homme et saige, maistre Thomas l'Escorchié, licencié en loys, advocat ou Chastellet dessus dit, lequel maistre Thomas estant enferme de corps, toutesvoyes par la grace de Dieu sain de pensée, et de bon et vray entendement, si comme il disoit, et comme de prime face apparoit aus diz notaires, attendant et saige-mént considerant qu'il n'est chose plus certaine de la mort ne moins certaine de l'eure d'icelle, et que à toute humaine creature par le décours du temps approuche de jour en jour le terme et la fin de sa vie, et pour ce, lui, non sans cause, pensant aux choses derrenieres, tandiz que force et vigueur regnent en soy et sens et raison gouvernent sa pensée, non voulant de cestuy mortel monde deceder intestat, mais voulant de tout son povoir remedier et pourveoir au salut de l'ame de lui, des biens et choses que Dieu Nostre Seigneur lui avoit et a prestez et envoyez, de son bon gré, bonne volenté, propre mouvement et de sa certaine science, sans force, fraude, erreur, induction ou contrainte aucunes, par bonne et meure deliberacion eue sur ce en son couraige et pensée deventraine, si comme il disoit, fist, nomma et ordonna, et par ces lettres, en la pre­sence et par devant yceulx notaires, fait, nomme et ordonne son testa­ment ou ordonnance de sa derreniere volenté, ou nom du Pere, du Filz et du benoist saint Esperit, en ia forme et pat* la maniere qui s'ensuit : Premierement et avant toutes choses, il, comme bon et vray catho­lique, recommanda tres humblement et devotement l'ame de lui, quant de son corps départira, à Dieu le Pere tout puissant, createur du ciel et de la terre, à Jhesu Crist, filz d'icelui, Nostre Sauveur et rédempteur, et au benoist saint Esperit, qui est un Dieu en trois personnes, à la tres glorieuse Vierge Marie, mere d'icelui nostre ré­dempteur, à monseigneur saint Michiel archange, à monseigneur saint Jehan Baptiste, saint Pierre, saint Pol, saint Jehan l'Evangéliste, à tous les benois sains et à toutes les benoistes saintes de Paradis.